自從港鐵伸延到黃埔站，唔知係咪方便咗呢? 好似越嚟越多親子好去處。最近喺黃埔有間「九號水產」(吓...唔係賣魚賣海鮮架咩?) 係有...但係最近仲加插了親子活動。
其實「九號水產」上年6月已經開幕，不過到最近才加插了些親子活動，成日俾洗牌，所以今日都要到現場玩番轉，睇吓究竟有幾好玩。
攪笑呀芊又主動要求我同佢影遊客相，扮出一副「吃貨」姿勢要食咗招牌上條魚。
其實「九號水產」係一個海產巿場，集特式食肆、食材零售、海鮮大街及私廚教室於一身。
名副其實，如果大家想食到新鮮日本空運到港海產，「九號水產」一定滿足你嘅願望。
不過先唔介紹D海產有幾新鮮，因為知道最近多咗個遊戲「小小車手大任務GoGoGo」，俾小朋友飛車穿越各商店完成任務，所以一同完條大魚打卡後就要即刻入場體驗下。
小小車手大任務GoGoGo
開放時間：每日下午2時至6時
費用：$40 / 10分鐘 限時內完成任務，集齊印仔可獲贈精美玩具。
高度要求：80cm – 120cm
其實玩法就好似以前TBB有個外購節目叫「BB也Shopping」，俾少少錢小朋友，呀媽扮病叫呀仔出街幫佢買餸，途中遇上各種考驗，最後買D唔買D完成任務番嚟俾呀媽攬住錫。
我一直都好想同細路玩呢個Game，但係你知香港地好難玩啦，一陣俾佢哋出街，任務未完成，一係唔見咗錢，一係連自己都唔見埋就大鑊。
但係喺「九號水產」呢度玩，就包保安全，因為全部任務就在「九號水產」內進行，呀哥同呀芊就揀咗架車開始去派發任務的地方。
呀哥知道戴頭盔會阻住哂，所以唔肯戴! 見到要孭住呢個背囊，仲話係女裝唔想孭。(後尾俾媽咪說服話係藍色所以先肯孭)
呀妹就好攪笑，點解係坐上鏟泥車去做任務，唔係去買餸咩?
職員哥哥超細心講解要完成的任務俾小朋友知，任務分咗難易兩種程度。
呀哥當然要做大事!
呀芊都偷聽一下究竟有D咩要做...
俾埋張地圖佢，一手一腳要自己完成。
終於到呀妹，佢揀咗個簡單任務去完成，只係去買蛋同埋拎去俾食店，煮個便當出嚟就攪掂。
唔知佢聽得閒幾多，一於拎住百零蚊出發!
小小車手大任務出發啦!
呀哥自己望住地圖，自己去到超巿先買食材。
因為佢聽到要10分鐘內完成，所以就雞咁腳飛車去下一個Check Point。
呀妹踩住架鏟泥車，慢慢un去超巿買蛋。
去到「海鮮大街」，哥哥一味望住我，佢見我唔理佢，佢終於要自己大大聲問「有冇人呀? 我要買魚呀!」
人哋問佢拎幾多錢就俾幾多錢人...都唔識望下自己要買幾多錢海鮮。
俾完錢拎咗隻蟹又就咁走咗去，去到呢度終於忍唔住提一提佢要拎張任務咭俾人蓋!
轉個頭呀妹已經完成任務，拎住盒(假)便當番去交差。
其實好多唔同任務，例如到場內為食肆運送新鮮食材、到場內選購食材製作大餐，或到甜品美食店及串燒店購買小食給媽媽等等。
全靠呢個得力助手(媽咪)，先可以完成到任務，呀妹還係要加把勁再主動D先得。
呀哥終於嚟到最後一站，將買到的食材都送給居酒屋，然後同樣拎到便當就番去交差。
超細心的職員哥哥，慢慢引導小朋友分享剛才的一切經歷。
呀哥由一開始不停迷路中去學習去問路、勇敢主動購買食材、自我管理金錢及事務安排。
整個過程佢非常享受，仲話好好玩好想玩多次。
呀妹雖然唔係好知做咩，不過媽咪從旁協助完成任務，佢都非常有滿足感，同埋自我信心都增強咗。
一切數數自己任務的收鑊。
蓋滿印仔的任務咭，可以換到精美的迪迪尼手巾仔。
室內電動車
開放時間： 星期一至星期五下午2時至晚上9時 ；星期六、日及公眾假期上午11時至晚上9時
費用：$40 / 10分鐘。
高度要求：80cm-140cm
場內仲有兩個小遊戲 - 電動車及跳彈床
兩個開學前一於玩到盡
最攪笑係呢D電動車係有搖控手掣，如果有太細嘅小朋友玩，家長可以用搖控器控制架車。
而且負責人都好有心，正值流感高峰期，所以都聲明要小朋友遊戲前玩都要洗手。
橫衝直撞嘅哥哥，其他小朋友有難囉!
充氣彈床區 – 附有其他小型遊樂設施及美國品牌玩具
開放時間： 星期一至星期五下午2時至晚上9時；星期六、日及公眾假期上午11時至晚上9時
費用：$40 / 10分鐘。
高度要求：80cm-140cm(少於80cm 需由家長陪同)
呢度真係一次過滿足哂兩個細路，因為哥哥鍾意玩車，芊芊就好鍾意跳彈床。
一直有通風系統在運作，所以唔駛驚在裡面跳會焗親小朋友。
記住兩個遊戲都係身高限於140cm之下及3-10歲小朋友。
商場內仲有個「私廚教室」，不定期會有不同的親子烹飪班，可以跟小朋友一齊做愛心得意卡通便當。
行到店的另一段出口附近，仲有個「漁港探知館」，就好似個迷你歷史博物館，俾大家打吓卡之餘，認識一下昔日漁村文化情懷。
我細細個都有用過的火水爐呀(暴露年齡)
邊個咁大整蠱攪到成個鑊都係鹹魚，哈哈~
呢一款懷舊煮飯仔又幾攪笑喎
隔離仲有介紹各大日本出名的魚類。
至於食肆總共有7間，當中有4間有提供兒童餐
「翔太壽司」(獲米芝蓮推薦)
電話：2834 3031
營業時間：12nn-2:30pm，6pm-11pm
備註：Omakase 須提早一天訂位，收加一
饒之味居酒屋
電話：2527 1916
營業時間：11:30am-3pm，6pm-10pm
備註：收加一，可外賣
饒之味居酒屋
電話：2527 1916
營業時間：11:30am-3pm，6pm-10pm
備註：收加一，可外賣
蟹筵
電話：2122 6788
營業時間：星期一至五12nn-3pm，6pm-11pm；星期六、日及公眾假期12nn-11pm
備註：須先以電話訂座，另收加一，不設外賣
而我哋今晚要食的就係這家「頣之味 」
頣之味
電話：2759 5526
營業時間：11:30am-10pm（壽司吧吧枱），11:30am-9:30pm（自助外賣區）
備註：吧枱區設加一服務費，外賣區消費 $12 起
電話：2759 5526
營業時間：11:30am-10pm（壽司吧吧枱），11:30am-9:30pm（自助外賣區）
備註：吧枱區設加一服務費，外賣區消費 $12 起
呢個兒童餐當然超豐富又好味，但係我覺得最特別係裡面呢包「廣島果粒啫喱飲品」，原來係老闆娘親自在日本周圍搜購番嚟，真係堅好飲。
「九號水產」內的專賣食材店有得賣$18，依家仲做緊九折。
野菜沙律
沙律裡面有呢條好得意食落好爽口嘅物體...問過經理原來係日本另一種海藻類，之後見我咁鍾意，再上多一碟仔俾我嘆，多謝經理呀!!!
然後到呢一個頭盤，件拖羅根腩一放咗入口，我好自然就合上眼，因為我估我自己想細細品嚐佢。
跟住媽咪就見到我面上露出微笑，我諗呢個微笑就代表咗一切，唔駛講嘢啦!
拖羅根腩、酸青瓜、冷豆腐配冷麵汁
3色吞拿魚刺身 (大拖羅、中拖羅、赤身)
壽司拼盤 (大拖羅、中拖羅、赤身)
吞拿魚沙律玉子燒
當我食完之後經理走過嚟問我「食物質素如何?」
我就答佢「無得頂，大滿足!!」
跟住佢話原來店名「頣之味」仲有個英文名叫「Daimanzoku」日文就係「大滿足」嘅意思。
碗碎葱吞拿魚腩迷你丼同鹽燒吞拿魚麵豉湯
最後食埋碗碎葱吞拿魚腩迷你丼同鹽燒吞拿魚麵豉湯。真係超級大滿足!
等我開估價錢係幾多....只係$288，真係超值呀!
節目真係一個接一個，在服務台對出仲有個「海底油樂園」的小遊戲，只要於「九號水產」任何消費滿$200就可以叫小朋友可以向服務台取一張印有龜或魚圖案的紙，然後創作出屬於自己的小魚小龜就可以了。
呀哥同呀芊玩呢個好有經驗駕輕就熟。
跟住再到服務台Scan入TVwall 搵番自己的小動物。
芊芊即刻搵到自己的小龜就不停跟住佢哋。
最後我哋再去咗「宏」食埋個甜品。
芊芊一坐好就已經點好想食D咩，果然女仔食甜品係用另一個胃。
香草牛奶軟雪糕芭菲 $88
牛奶雪糕無得頂，勁番牛奶味，另外小丸子係店主自家製，超煙韌唔黐牙!
同頭先一樣，班戟係店內自家製，配上焦糖布甸真係甜度啱啱好，即使加上士多啤梨醬後都唔會甜到漏。
日本草莓班戟 $88
最後要介紹這個「優質食材專賣店」，接近7,000呎，七成貨品從日本產地直送。
真係好似行緊大百貨公司咁，唔駛同人逼嚟逼去，仲有勁多選擇。
唔係講笑，真係閒閒哋可以喺度食買玩成個下晝。
小貼士：「九號水產」有提供消費金額換遊戲劵, 記住去到問服務台職員!
Photo by CANON 5D Mark IV, Len | EF 16-35mm f/2.8L USM
想跟我去體驗其他活動，快D報名親子團，同埋留意專頁公佈詳情啦！
呀劍評分: 10分
呀劍評語: 如果唔係親身入嚟，聽個名一直只知道係一個魚巿場，一向食開住家菜嘅我，又點會行入嚟。但係自此以後，各位爸媽又多個親子好去處，就算唔係嚟買食材，都可以嚟玩餐飽。
九號水產是個別開生面的水產概念場，佔地五萬呎，一站式提供食肆、水產及食材零售、私廚教室、漁港探知館及兒童互動樂園等。九號水產藉著向香港昔日的漁港歷史致敬，以實惠價格推廣高質量水產和食材，宣揚健康飲食的理念，並由新華日本食品掌舵人蔡紹霞May姐坐鎮，深入食材源產地嚴選採購上乘食材，直送到港。能將口福、資訊、娛樂、消費共治一爐，九號水產勢必成為香港飲食娛樂的新地標。
地點
九龍紅磡德豐街8號黃埔新天地第九期地下
開放時間
10:00 AM - 10:00 PM
網址
http://www.heritagemuseum.gov.hk
https://www.facebook.com/nineseafoodplace
查詢
2121 0606
RELATED POST
13 Aug, 22
【親子好去處】荃灣西如心酒店 動漫迷之選 新世紀福音戰士「仲夏狂歡住宿體驗」
今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去 荃灣西如心酒店 來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。
01 Dec, 21
【親子好去處】AK都有玩 Sasuke Fitness Ninja Warrior 化身忍者挑戰關卡
平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。
25 Aug, 21
【親子好去處】Dunk Sports Training Centre 起躍體育訓練中心 全集中の訓練 信心と堅持
做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。
04 Aug, 21
【親子好去處】悅來酒店 Panda Hotel 熊貓夏祭食宿套餐 扮番鄉下の旅人
又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。
30 Jul, 21
【親子好去處】暑假必到 Pixar 彼思動畫的科學秘密 @科學館HKSCM
上次去完 Pixar Fest，今次又來一個Pixar #彼思動畫的科學秘密，點可以錯過呀，真係今個暑假必到的好去處。
29 Jul, 21
【親子好去處】遨凱酒店 The Olympian 豪華入住 超高樓底 五星級套房
暑假過咗一半，點可以俾佢停，一於再去Staycation，為一家人製造更多美好回憶～今次來到奧運站附近的酒店～遨凱酒店 The Olympian Hong Kong今次來到一個超「隱世」...都係唔好講「隱世」(廢事好似太誇張咁) 但係我經過這裏超多次，都一直沒有留意到原來有間酒店。