親子室內

【親子好去處】黑暗中對話體驗館 dialogue in the dark exhibition

02 Sep, 18

等咗咁多年終於有機會到「黑暗中對話體驗館」,雖然係第一次來體驗,但同時亦可能係最後一次,因為租約期滿後暫時停止運作,最終營業日為2018年9月30日...


因為「黑暗中對話體驗館」最低入場年齡資格都要5歲,所以一直打算等芊芊夠5歲先至全家出動去體驗一次。


我覺得可以用又驚、又喜、又刺激、又感動去形容今次的體驗,不過體驗館營業到9月30日,我實在很鼓勵大家把握這個月內去體驗一次。



如果大家真的計劃去體驗一次,就不要再看下去了,哈哈~因為下文嚴重劇透。



其實體驗館提供不同類型的黑暗體驗,有「黑暗中對話體驗」、「出雙入對情人之旅」、「愛家樂-溫馨之旅」、「暗中夜宴」及「暗中生日會」(聽個名都知道內容為甚麼對象而設吧!)



未入場先興奮,因為芊芊已經俾呢隻大啤啤吸引咗過去。


原本有打算參加「愛家樂-溫馨之旅」,不過想參與的日子名額已滿,所以就選擇了「黑暗中對話體驗」,每組最多8人,我們一家四口同着另外兩對情侶參加(應該係除非唔係)。



當完成網上報名後,於體驗日期前一天會以whatsapp提醒參加者,實在好貼心!由於唔想錯過任何一個環節,所以都跟職員指示早15分鐘就到現場準備,既然未入場體驗就先周圍參觀一下。



除了有些紀念品售賣外,仲有一個意見牆,大家都將體驗後的感覺寫上Memo紙貼在牆上。






當然少不了要在這個主題背景打打咭吧!



終於到我哋可以喺度影番張相啦!



究竟哥哥同芊芊入去體驗黑暗時會點樣呢?




兩個小朋友最喜歡就係畫畫,餘下幾分鐘就入場也要把握機會去畫一畫。



這邊有個古怪箱,好似個抽獎箱咁!原來係一個小遊戲,俾朋友伸手入去摸一摸,四個洞分別去估四個字成語。




哥哥估到哂頭三個字「一」「石」「二」...最後個洞佢摸到「雞」...哈哈!我真係未聽過有成語叫「一石二雞」囉!


答案就在最後,自己可以掀開睇睇。(不過我已經講咗啦!噢...)




入場前記住去好洗手間(因為整個體驗有75分鐘),同埋有免費儲物櫃提供俾大家,可以將所有包包電話等放哂入去。


我好耐未試過可以咩都唔拎(特別係相機),可以兩手空空就咁入去體驗活動。

以下我準備要劇透整個活動。(唔想知記住唔好再睇落去)

整個「黑暗中對話體驗」包括了5個真實場景,各場境均有其獨特的質感、聲音、氣味甚至味道。

大家進場後(還在有燈光的位置),職員先講解一下所有規則及派發每人一支盲人手仗。

進入黑暗館後又另一位導賞職員帶領我們,哥哥同芊芊一入到四圍黑暗的地方就立即好多說話...

芊芊「點解我掰大對眼都仲係見到黑鼆鼆 ?」
哥哥問導賞姐姐「點解你可以睇到周圍?一陣間完咗你要話俾我知。」
(我即刻頭挨落媽咪度笑,其實笑中又有點淚,因為我已經知道點解...)

第一站我哋先去到一個佈滿雀鳥植物,充滿青草氣味的的大自然(你可以覺得係公園,可以覺得係森林,大家可有無限的想像),踏上去的草地感覺挺真實,途中經過的小橋流水也真是觸摸得到的水。

第二站去到一個碼頭,而且真的踏上船板,坐在船上乘風破浪,途中聽見海鷗及快艇經過。憑吹在臉上的海風,及摩打發出的聲音,就分辨到船頭船尾。

第三站是在馬路上、超巿、舊屋邨。大家就是摸到很多水果、蔬菜、罐頭等食品,信箱、鐵閘、門鐘等。聽見綠燈的響聲就一起急急的過馬路。

第四站是電影院,大家走進戲院內安坐聽戲,那時大家真的不發一聲,就連哥哥及芊芊也突然安靜起來,細心去聆聽播放的聲音,藉着聲音去自己思考影像。當中有一段水滴聲音,哥哥竟然聯想到是「冷氣機滴水」,真的笑死人。

第五站就是Cafe,大家一齊去體驗黑暗中去點餐及找座位進食。我們買了兩支神秘飲品($10讓職員隨意給我們)及兩個朱古力批(不要想是甚麼美食,只是一般超巿便利店買到的朱古力小蛋糕)。論盡的哥哥就是在黑暗中也是烏龍,一打開飲品就把樽蓋弄跌,然後他到處地上去摸摸看,然後摸着一隻腳就問「邊個隻腳嚟㗎?」真的笑翻肚,原來係另外參加者姐姐的腳。她還叫哥哥「可唔可以再按摩多幾吓。」

整個黑暗體驗,我發現有幾處地方讓我感受很不同:

1. 由於在黑暗中,我睇唔見對方,雖然有一支盲公竹,但係還是很希望用叫聲及觸摸去找回家人,我經常摸着哥哥,芊芊及媽咪,因為怕他們會跌倒,怕他們會不知道走到哪,所以中間有段時間哥哥同芊芊都抱緊我的手,那時真的感覺到他們很需要我。

2. 雖然知道這只是暫時,但卻也很能體會到失明人士起初那種無助及恐俱,不過同時又會發現看不見的幸福,就是可以更留意到身邊的事物,更享受於當中。再者也發覺時間像過得特別慢,相比起我們看得見的生活,忙東忙西沒有一刻靜下來,時間每天也不夠用。

3. 到最後Cafe的場景(當時導賞員已開估自己是一位失明人士),導賞員亦讓大家有發問時間,一方面問着導賞員她的失明經過,另一面問着他如何解決生活上的不便之處。我卻問她如何看待自己的經歷,因為哥哥跟導賞姐姐說出自己眼睛都有少許問題,我希望借導賞姐姐的經歷去影响他,(不是說姐姐比他有多可憐)反而是希望他不要過份自憐埋怨,面對困難要積極的去面對解決。導賞姐姐不單鼓勵哥哥要樂觀面對,也跟他說現在科技很高,可以從小就做物理治療去改善。我發現大家在黑暗中,彼此看不見對方,反而更勇於去表達及溝通,更了解彼此。

以上啟發了我生活上要有這3方面的「更多」
更多的擁抱」、「更多的放慢」、「更多的溝通」


我的確無意要劇透這個體驗活動,只是不得不把自己的立時感受寫下來。但願「黑暗中對話體驗館」能找別的地方再跟大家見面。


Photo by Sony A7III FE 28mm F/2

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 10


呀劍評語: 一個又驚又喜又好玩...又感動的活動,前者當然是去體驗失明人士的世界,這個暫時的失明帶來很多新鮮的驚喜。後者為着這個體驗有感動,當然是知道帶領着大家的導賞員就是失明人士(我很早前就已經知道),給他們的樂觀正能量激勵到!希望體驗館將來能再同大家見面,到時一家必定會再到場支持去體驗。

地點
美孚黑暗中對話體驗館 九龍美孚景荔徑8號盈暉薈2樓215號鋪

開放時段
星期一至日及公眾假期,上午10:30 – 下午7:30
(以上資料更新至文章當日)




                 

搜尋

文章分類

RELATED POST