【親子好去處】CUPNOODLES MUSEUM HONG KONG 合味道紀念館

古人有愚公移山，今日有愚芊倒杯麵！合味道紀念館終於開在巿區(尖沙咀)啦！以前話冇去日本玩唔到，依家仲邊有藉口話去唔到呀？～

睇吓呢個神力芊，係佢主動話要擺呢個甫士叫我幫佢影相。

入番正題，其實合味道紀念館早在2016年就已經登陸咗香港，當時係叫做「我的合味道工作坊」及「出前一丁工作坊」，座落在香港國際機場二號客運大樓童夢城通識學園內。

不過依家大家唔駛去機場或者飛去日本先有得玩啦～

因為已經登陸在尖沙咀中港城，大家只需要在網上購票，在你選購的時段前半個鐘就可以提早進場。

雖然仲未可以入去工作坊，但係提前進場都係為咗控制人流，等部份參加者可以先在紀念館地方參觀打卡。(當然你都可以於完成工作坊後，留在現場繼續參觀打卡啦～)

我哋以電郵的QR code進場，然後消毒量溫填表後...(依家去玩真係事前有一大堆動作要做) 跟住就到工作人員前去取工作坊門票。

紀念館帶來全新的體驗，有別於日本大阪池田及橫濱的「合味道紀念館」，佔地近10,000平方呎的紀念館，以「安藤百福創造力之旅」為主題，特設三大全新必到打卡位及三大體驗式工作坊。

一入場第一個打卡位，就係成千個不同款式杯麵擺在你眼前，我忍唔住都要數一數，究竟有邊款我係未食過㗎呢？

所以一眾合味道迷要注意呢個打卡位呀！

合味道紀念館香港是向一生為食品創新而努力的安藤百福先生致敬。

第一包即食麵誕生啦！真係人類偉大的發明。

其實除咗玩，大家都可以認識一下日清的歷史。

杯麵的發明都好勁㗎，唔好以為就咁將個麵餅放入杯就原成，其實每個位都計算得好精細㗎～

離遠見到第2個打卡點啦！即刻好心急想快D過去影。

不過其實唔駛咁擔心，因為每節工作坊人流管制得好好，所以其實好少人，可以打完再打！

好似我哋咁，影完又覺得麻麻地，於是又再番轉頭影多幾次。

居然跟住俾呢個傻妹諗到個好好的姿勢，影出嚟冇咁悶！

沿住地上的顏色線去你所屬的工作坊。

經典的「我的合味道工作坊」和「出前一丁工作坊」當然唔少得，我哋終於大鄉里出城，今次可以親手設計自己的杯麵。

下次我哋一定要再嚟整「出前一丁」，而且工作坊時間為90分鐘，感覺上好似抵玩好多。

今次紀念館重點推介全球獨家限定兼全新登場的「榖物麥片工作坊」(My Granola Factory)。我打算下次再預約時就一次過「出前一丁」同呢個工作坊一齊預約。

進場前工作人員先同每組參加朋友講解工作坊流程。不過我覺得如果可以做個動畫介紹，就唔駛姐姐們講到口水都乾哂～

其實最主要都係叫大家記住寫上日期同埋唔好畫出界啫！

大家如果早入場就可以被安排去圓枱坐，如果唔係可以要同人一切坐直枱，影起相上嚟就冇咁就手喇～

每人先取一個杯，然後待工作人員安排入坐，就可以開始畫公仔填色。

我建議大家來之前就要諗定想畫咩公仔，因為到時你只有約20分鐘去畫，免得畫咗唔知乜嘢就後悔喇～

哥哥就畫佢近期至愛的Dragon Ball Legend。

妹妹一如以往畫上佢最喜歡的蛙蛙。

媽咪唔聲唔聲畫得咁靚...(一起初又話唔知畫咩好！)

以我就畫咗哥哥同妹妹個樣，係日清仔版！

工作人員非常好，主動問我哋要唔要影張全家幅！

完成哂之後，就要選擇杯麵的配料。

我就揀好哂啦，大家都係最鍾意食海鮮味杯麵。

跟住就排隊輪住將自己的杯麵杯，俾工作人員為自己打造獨人無二的合味道杯麵啦～

排緊隊時侯都不忘打卡，大約只係等3-5分鐘度就到啦！(當然如果你畫得快，早完成就可以更好的去製作杯麵免排隊)

參加者可以參與一起製作杯麵喔～

成功將麵餅壓進杯裡。

之後工作人員就會按剛才選擇的配料，幫我哋放進杯麵裡。

工作人員知道我哋4個杯麵同屬一家人，專登放埋一齊俾我影相。

然後封頂包裝。

我哋個杯麵完成啦～全球只得一個

最後最後，大家就可以將自己的杯麵用充氣袋包實，穿埋條掛頸繩就大功告成啦～

兩個一手一腳自己完成(仲幫埋我)，真係巧叻叻喔～

佢哋兩個話要即刻番屋企煮嚟食。

臨走前當然要你穿過埋呢個Popup Store先至放你走啦！

最強勁係呢兩個合味道同埋出前一丁的真金擺設，寫明「有興趣者向職員查詢」，睇嚟一D都唔平。

其他精品一樣咁靚咁吸引，唔想俾細路纏住要買呢樣嗰樣，我勸你就快快走過就算。

整體嚟講這個體驗不錯，價錢不算貴，算是疫情中一個親子好去處。

結果真係番到屋企，就話要煲滾水煮嚟食。仲諗住可以成個唔開留做紀念，依家就食完得番個杯...

我咁大個仔第一次食咁新鮮的杯麵呀，算唔算係即叫即做即煮...即食～

開餐啦～～～～

Photo & Video by Sony A7III FE 16-35mm F/2.8 + iPhone11 Pro

想跟我去體驗其他活動，快D報名親子團，同埋留意專頁公佈詳情啦！http://goo.gl/forms/CNZMEPoMIWkouK8o2

合味道紀念館香港

地點：尖沙咀中港城2樓26-35號

開放時間：

逢星期一、二、四、日：上午11時15分至下午8時15分

逢星期五、六及公眾假期：上午11時15分至下午9時15分

逢星期三：休館

票務詳情：訪客請提前於網上預約參加工作坊（www.cupnoodles-museum.com.hk）。

*紀念品店免費入場。

我的合味道工作坊

$60 ；30 分鐘；3歲以下並不佔座位幼童，可在成年人陪同下免費入場。

出前一丁工作坊

$120 90 分鐘參加者的最低身高要求為110厘米。

穀物麥片工作坊

$60 30 分鐘參加者須年滿3歲。

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : www.kimfamilytravel.com

13 Aug, 22

【親子好去處】荃灣西如心酒店動漫迷之選新世紀福音戰士「仲夏狂歡住宿體驗」

今個學年好似返咗好耐，全因為無嗱嗱多咗個復活暑假，攪到今個真暑假短到核爆，但係「玩」必須繼續，一於去荃灣西如心酒店來個 Staycation 玩盡個 Weekend～如心酒店坐落如心廣場，其實真係超方便，鍾意的話可以走過附近商場食買玩，再唔係去返荃灣巿中心掃街又得，不過酒店咁多設施，又駛乜周圍搵嘢玩。

01 Dec, 21

【親子好去處】AK都有玩 Sasuke Fitness Ninja Warrior 化身忍者挑戰關卡

平時睇電視食花生就多，估唔到今日第一次去玩Ninja Warrior係咁好玩～今日帶芊芊去玩新玩意，就係化身去做忍者，學人飛蟬走壁，其實呢樣玩意係叫做 Ninja Warrior，喺外國係好出名，不過在香港都真係幾少有。

08 Nov, 21

【親子好去處】小白兔音樂農莊 New Bunny Wonderland 兔！全部都係兔

久違了農莊親子遊一段日子，今日終於可以再去親親大自然，而且今次都係久地重遊。

25 Aug, 21

【親子好去處】Dunk Sports Training Centre 起躍體育訓練中心全集中の訓練信心と堅持

做人一定要有火，唔係話要火爆，而係要有鬥志專心去做一件事，今日就帶咗哥哥同芊芊來打籃球。

16 Aug, 21

【親子好去處】STEM Carnival @ Cyberport 大玩編程 DJI無人機 RoboMaster 參觀智能農場餐廳

今個暑假不單只同陽光與海灘玩遊戲，有時靜靜地鍛鍊一下大腦玩玩編程都很好，今次由Ask Idea 和 DJI Education 舉辦的「ASK Idea呈獻：STEM嘉年華」就在數碼港 Cyberport 同大家一齊開心玩啦。

04 Aug, 21

【親子好去處】悅來酒店 Panda Hotel 熊貓夏祭食宿套餐扮番鄉下の旅人

又係望梅止渴的時侯，因為今個暑假逢星期五至日 #悦來酒店將會舉行「#熊貓夏日祭」🚩，去唔到日本都扮去咗～特別介紹的是日式美食亭，有盡各樣串燒同甜品美食，黑豚腩串燒係我哋至愛，肉爽又好香口，加埋串燒醬汁簡直無得輸；仲有海鮮大阪燒同埋和牛餐包，連媽咪佢都話好食(真係好難得)🤭其他仲有大葱、燒菇、鹽燒雞翼、安格斯牛肉串、汁燒帆立貝、蒲燒䲆魚💦真係再講番都留哂口水。